بنگلہ دیش آسٹریلیا کے خلاف ٹیسٹ کرکٹ کی تاریخ کی بڑی فتوحات میں سے ایک کے قریب پہنچ چکا ہے، جب پہلے ٹیسٹ کے تیسرے روز آسٹریلیا نے چار وکٹوں کے نقصان پر 161 رنز بنائے ہیں اور اسے اننگز کی شکست سے بچنے کے لیے مزید 67 رنز درکار ہیں۔
کیمرون گرین 43 اور ایلکس کیری 19 رنز پر ناٹ آؤٹ رہتے ہوئے آسٹریلیا کو سنبھالا دینے کی کوشش کر رہے ہیں۔
بنگلہ دیش اگر ڈارون میں کھیلا جا رہا یہ میچ جیتتا ہے تو یہ اس کی آسٹریلیا میں پہلی ٹیسٹ فتح ہو گی۔
351 رنز چھ کھلاڑی آؤٹ سے آج دن کا آغاز کرنے والے بنگلہ دیش نے مہدی حسن میراز کی پُراعتماد بیٹنگ کی بدولت مزید 75 رنز کا اضافہ کیا اور مجموعی سکور 426 تک پہنچا دیا۔
یوں مہمان ٹیم کی پہلی اننگز کی برتری 200 رنز سے تجاوز کر گئی۔
انہوں نے حسن محمود کے ساتھ 46، تاج الاسلام کے ساتھ 18 اور تسکین احمد کے ساتھ 46 رنز کی مفید شراکتیں قائم کیں، تاہم بالآخر 154 گیندوں پر 65 رنز بنا کر آؤٹ ہوگئے۔
مہدی حسن نے بعد ازاں اپنی بولنگ سے بھی اہم کردار ادا کیا اور دن کے آخر میں سٹیو سمتھ کی قیمتی وکٹ حاصل کی۔
آسٹریلیا نے ہفتے کو بھی فیلڈنگ میں متعدد مواقع ضائع کیے اور مزید تین کیچ چھوڑے۔ ان میں سمتھ کی جانب سے ڈیپ میں چھوڑا گیا ایک ناقابل یقین کیچ بھی شامل تھا۔
یوں پوری اننگز میں میزبان ٹیم نے پانچ کیچ ڈراپ کیے۔
ہیزل وڈ کے 300 ٹیسٹ وکٹیں
جاش ہیزل وڈ نے آج گرنے والی چاروں وکٹیں حاصل کیں اور 28 اوورز میں 89 رنز دے کر کُل چھ وکٹیں لیں۔
مہدی حسن کی وکٹ ان کی اننگز میں پانچویں وکٹ تھی اور اس کے ساتھ ہی وہ ٹیسٹ کرکٹ میں 300 وکٹیں مکمل کرنے والے آسٹریلیا کے نویں بولر بن گئے۔
آسٹریلوی بیٹر ٹریوس ہیڈ 15 اگست، 2026 کو ڈارون میں بنگلہ دیش کے خلاف پہلے ٹیسٹ میچ کے تیسرے روز حسن محمود کے ہاتھوں آؤٹ ہونے کے بعد (اے ایف پی)
وہ آسٹریلیا کے مشہور ’بگ فور‘ بولنگ اٹیک میں یہ سنگِ میل عبور کرنے والے چوتھے بولر بھی ہیں۔
ہیزل وڈ نے اس کے بعد عبادت حسین کو سات رنز پر وکٹ کیپر کے ہاتھوں کیچ کرا کے بنگلہ دیش کی اننگز 426 رنز پر ختم کردی۔
آسٹریلیا کی ٹاپ آرڈر مشکلات برقرار
آسٹریلیا نے چائے کے وقفے سے قبل ہی اپنے دونوں اوپنرز کھو دیے، جس سے بنگلہ دیش نے میچ پر اپنی گرفت مزید مضبوط کر لی۔
جیک ویدرلڈ صفر اور ٹریوس ہیڈ 17 رنز بنا کر حسن محمود کی گیند پر کٹ شاٹ کھیلنے کی کوشش میں بولڈ ہوئے۔ یوں آسٹریلیا 37 رنز پر دو وکٹوں سے محروم ہوگیا۔
حسن محمود نے اس کے ساتھ میچ میں اپنی وکٹوں کی تعداد آٹھ کر لی۔ انہوں نے پہلی اننگز میں 55 رنز دے کر چھ وکٹیں حاصل کی تھیں، جس کی بدولت آسٹریلیا صرف 198 رنز پر آؤٹ ہوا۔
اس سیکشن میں متعلقہ حوالہ پوائنٹس شامل ہیں (Related Nodes field)
مارنس لبوشین بھی خراب فارم سے نکلنے کی کوشش میں تھے۔ وہ کریز پر پُراعتماد نظر آئے لیکن تاج الاسلام کی سیدھی گیند کو نہ سمجھ سکے اور 59 گیندوں پر 31 رنز بنا کر بولڈ ہوئے۔
میچ بچانے کی آسٹریلیا کی امیدیں اب تجربہ کار سمتھ سے وابستہ تھیں، جو حسب معمول کم خطرہ مول لیتے ہوئے آہستہ آہستہ رنز بناتے رہے اور پُراعتماد دکھائی دیے۔
تاہم میچ کا رخ ایک بار پھر بنگلہ دیش کی جانب اس وقت مضبوطی سے مڑ گیا جب مہدی حسن نے ان کا تیز ریٹرن کیچ پکڑ لیا۔
سمتھ 44 رنز بنا کر آؤٹ ہوئے اور آسٹریلیا 122 رنز پر چار وکٹیں گنوا چکا تھا جبکہ اسے اب بھی 106 رنز کا خسارہ تھا۔
آسٹریلیا نے اپنی سرزمین پر کسی ٹیسٹ میں پہلی اننگز کے سب سے بڑے خسارے سے کامیاب واپسی 206 رنز کے خسارے کے بعد کی تھی، جب 2010 میں سڈنی کرکٹ گراؤنڈ پر اسے پاکستان کے خلاف اتنے ہی خسارے کا سامنا تھا۔
دو ٹیسٹ میچوں پر مشتمل ’ٹاپ اینڈ‘ سیریز آسٹریلیا کے لیے اگلے 12 ماہ پر محیط ایک انتہائی مصروف شیڈول کا آغاز ہے، جس میں مجموعی طور پر 20 ٹیسٹ میچ شامل ہیں۔
آسٹریلوی ٹیم کو اس دوران جنوبی افریقہ، انڈیا اور انگلینڈ کے دورے کرنے ہیں۔
