اسلام آباد: خاتون کو بچاتے ہوئے پاکستان فضائیہ کے افسر کی فائرنگ سے موت

پاکستان فضائیہ کے سینیئر افسر اتوار کو اسلام آباد میں ایک خاتون کو بچاتے ہوئے فائرنگ سے جان سے چلے گئے جبکہ ملزم موقعے سے فرار ہو گیا۔

مقامی میڈیا کے مطابق گروپ کیپٹن عاصم طارق نائنتھ ایونیو سے گزر رہے تھے کہ انہوں نے ایک موٹرسائیکل سوار کو ایک خاتون کا ہاتھ کھینچتے دیکھا۔ 

صورت حال کو مشکوک محسوس ہونے پر وہ واپس مڑے اور موٹرسائیکل کے قریب جا کر مداخلت کی، جس پر خاتون گاڑی کی دوسری جانب آ گئی۔

اسی دوران ملزم سعد نے عاصم طارق سے تلخ کلامی کی اور چند لمحوں بعد ان پر فائرنگ کر دی جس سے وہ جان سے چلے گئے۔ ملزم موقعے سے فرار ہو گیا۔

پولیس کے مطابق خاتون نے ابتدائی بیان میں بتایا کہ ملزم دفتر میں ان کا سابق کولیگ تھا، جس نے انہیں کام پر ساتھ لے جانے کی پیشکش کی تھی۔

تاہم جب اس نے راستہ تبدیل کر کے کسی اور مقام پر لے جانا چاہا تو خاتون نے مزاحمت کی۔ 

پولیس کا کہنا ہے کہ ملزم کی گرفتاری کے لیے قانون نافذ کرنے والے ادارے مختلف مقامات پر کارروائیاں کر رہے ہیں اور واقعے کی مزید تحقیقات جاری ہیں۔ 

وزیر داخلہ محسن نقوی نے واقعے میں ’گروپ کیپٹن عاصم طارق کی شہادت پر گہرے دکھ اور افسوس کا اظہار کیا ہے۔‘

وزارت داخلہ کے ایکس اکاؤنٹ پر جاری تعزیتی بیان میں محسن نقوی نے عاصم طارق کے اہل خانہ سے دلی ہمدردی اور تعزیت کا اظہار کرتے ہوئے کہا کہ انہوں نے ایک ذمہ دار شہری کی حیثیت سے بے مثال جرات اور بہادری کا مظاہرہ کرتے ہوئے اپنی جان قربان کی، جسے ہمیشہ یاد رکھا جائے گا۔