راولپنڈی میں اتوار کو کھیلے گئے ون ڈے میچ میں آسٹریلیا نے پاکستان کو جیت کے لیے 201 رنز کا ہدف دیا ہے۔
تین ایک روزہ میچوں کی سیریز کے پہلے میچ میں پاکستان نے ٹاس جیت کر پہلے فیلڈنگ کا فیصلہ کیا، جس کے بعد آسٹریلوی ٹیم 45ویں اوور میں 200 رنز بنا کر آؤٹ ہو گئی۔
آسٹریلیا کی جانب سے میتھیو رن شا نے 61 اور میتھیو شارٹ نے 55 رنز کی نمایاں اننگز کھیلی، جبکہ میتھیو کوہنمین نے 24 رنز بنائے۔
اس سیکشن میں متعلقہ حوالہ پوائنٹس شامل ہیں (Related Nodes field)
پاکستان کے بولنگ اٹیک نے آسٹریلین بلے بازوں کو ٹف ٹائم دیا۔ ڈیبیو کرنے والے نوجوان فاسٹ بولر عرفات منہاس نے صرف 32 رنز کے عوض پانچ وکٹیں حاصل کیں۔ ابرار احمد نے دو کھلاڑیوں کو آؤٹ کیا جبکہ کپتان شاہین آفریدی، سلمان آغا اور حارث رؤف نے ایک ایک وکٹ حاصل کی۔
اس میچ کے ساتھ ہی پاکستان نے ون ڈے کرکٹ میں ایک اہم سنگِ میل بھی عبور کیا، اور ایک ہزار ون ڈے میچز کھیلنے والی دنیا کی تیسری ٹیم بن گئی، اس سے قبل یہ اعزاز صرف آسٹریلیا اور انڈیا کو حاصل تھا۔
قومی کپتان شاہین آفریدی نے اس موقعے کو ٹیم کے لیے تاریخی قرار دیتے ہوئے کہا کہ ہزارواں ون ڈے کھیلنا اعزاز ہے اور ٹیم کی کوشش ہوگی کہ اس تاریخی میچ میں شاندار کارکردگی دکھا کر فتح حاصل کی جائے۔
پاکستان کی پلیئنگ الیون میں شاہین آفریدی (کپتان)، صاحبزادہ فرحان، معاذ صداقت، بابراعظم، غازی غوری (وکٹ کیپر)، سلمان علی آغا، عبدالصمد، شاداب خان، عرفات منہاس، حارث رؤف اور ابرار احمد شامل تھے۔ نوجوان فاسٹ بولر عرفات منہاس نے اس میچ میں اپنا ون ڈے ڈیبیو بھی کیا۔
