|
ایران کے خلاف امریکہ اور اسرائیل کی مشترکہ جنگ کو آج 27واں دن ہے۔ امریکہ نے اسے ’آپریشن ایپک فیوری‘ جبکہ ایران نے جوابی کارروائی کو ’وعدہ صادق 4‘ کا نام دیا ہے۔ اس جنگ کے تازہ ترین اپ ڈیٹس۔ |
صبح 7 بج کر 26 منٹ
ایران معاہدے کے لیے بے تاب مگر کہنے سے ڈرتا ہے: ٹرمپ
امریکی صدر ڈونلڈ ٹرمپ نے بدھ کو ایک بار پھر کہا کہ ایران امن مذاکرات میں شامل ہے، اور اشارہ دیا کہ تہران کی جانب سے انکار اس لیے کیا جا رہا ہے کیونکہ ایرانی مذاکرات کاروں کو ’اپنے ہی لوگوں کے ہاتھوں مارے جانے کا خوف‘ ہے۔
خبر رساں ادارے اے ایف پی کے مطابق صدر ٹرمپ نے ریپبلکن ارکانِ کانگریس کے اعزاز میں دیے گئے عشائیے سے خطاب کرتے ہوئے کہا کہ ’وہ (ایران) دراصل مذاکرات کر رہے ہیں اور وہ معاہدہ کرنے کے لیے بے حد بے تاب ہیں۔ لیکن وہ یہ بات کہنے سے ڈرتے ہیں کیونکہ انہیں لگتا ہے کہ انہیں اپنے ہی لوگ مار دیں گے۔
’انہیں یہ بھی خوف ہے کہ ہم انہیں مار دیں گے۔‘
امریکی صدر کے یہ بیانات اس وقت سامنے آئے جب ایرانی وزیر خارجہ عباس عراقچی نے کہا کہ ’ہم مذاکرات کا ارادہ نہیں رکھتے۔‘
