بلوچستان کے ضلع لسبیلہ میں جمعے کی شام مسافر کوچ اور وین کے درمیان تصادم کے نتیجے میں پانچ خواتین سمیت 14 افراد جان سے گئے، جبکہ 20 افراد زخمی ہوئے۔
ایس ایس پی لسبیلہ نجیب اللہ پندرانی نے انڈپینڈنٹ اردو کو بتایا کہ حادثہ جمعے کو شام تقریباً چار بجے وندر کے قریب پیش آیا، جہاں گوادر سے کراچی جانے والی مسافر کوچ اور کراچی سے لسبیلہ آنے والی مسافر وین آپس میں ٹکرا گئیں۔
انڈپینڈنٹ اردو کا واٹس ایپ گروپ یہاں جوائن کریں
حادثے کے بعد زخمیوں کو فوری طور پر مقامی ہسپتال منتقل کیا گیا، جبکہ شدید زخمیوں کو مزید علاج کے لیے کراچی کے ہسپتالوں میں منتقل کر دیا گیا۔
اس سیکشن میں متعلقہ حوالہ پوائنٹس شامل ہیں (Related Nodes field)
ریسکیو ذرائع کے مطابق حادثے میں زخمی ہونے والی ایک خاتون اور ایک مرد دوران علاج دم توڑ گئے، جس کے بعد جان سے جانے والوں کی مجموعی تعداد بڑھ کر 14 ہو گئی۔
ایس ایس پی لسبیلہ نجیب اللہ پندرانی کے مطابق حادثے میں 20 افراد زخمی ہوئے، جن میں سے متعدد کی حالت تشویشناک بتائی جا رہی ہے۔
نجیب اللہ کے بقول ابتدائی معلومات کے مطابق حادثہ تیز رفتاری کے باعث پیش آیا۔
ان کے مطابق پولیس نے حادثے کی وجوہات اور اس کے ذمہ دار عوامل کا تعین کرنے کے لیے تحقیقات شروع کر دی ہیں۔
خبر رساں ادارے اے ایف پی کے مطابق ایک پولیس افسر نے بتایا کہ ’حادثہ اتنا شدید تھا کہ دونوں گاڑیوں کے ڈرائیور بھی جان سے گئے۔‘ پولیس افسر کے مطابق زخمیوں میں سے متعدد کی حالت تشویشناک ہے۔
