سنجو سیمسن کی 22 گیندوں پر 57 رنز کی جارحانہ اننگز کی بدولت انڈیا نے منگل کو افغانستان کو دوسرے ٹی 20 میچ میں 7 وکٹوں سے شکست دے کر تین میچوں کی سیریز اپنے نام کر لی جبکہ ایک مقابلہ ابھی باقی ہے۔
انڈیا نے 159 رنز کا ہدف 14.5 اوورز میں 3 وکٹوں کے نقصان پر حاصل کرلیا۔ سنجو سیمسن نے اپنی اننگز میں 7 چوکے اور 4 چھکے لگائے۔ یہ رواں سال ٹی 20 ورلڈ کپ کے فائنل کے بعد ان کی پہلی نصف سنچری ہے، جہاں انہیں پلیئر آف دی ٹورنامنٹ قرار دیا گیا تھا۔
انڈیا کی جانب سے ابھیشیک شرما نے بھی جارحانہ بیٹنگ کرتے ہوئے 19 گیندوں پر 39 رنز بنائے، جس میں 4 چھکے شامل تھے۔ سنجو سیمسن اور ابھیشیک شرما نے ابتدائی 38 گیندوں پر 88 رنز کی شراکت قائم کی۔
انڈپینڈنٹ اردو کا واٹس ایپ گروپ یہاں جوائن کریں
افغانستان نے پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 159 رنز بنائے۔ انڈیا کی جانب سے آل راؤنڈر نتیش ریڈی نے تین اوورز میں 24 رنز دے کر تین وکٹیں حاصل کیں۔
ہدف کے تعاقب میں انڈیا نے پاور پلے کے چھ اوورز میں بغیر کسی نقصان کے 82 رنز بنا کر میچ پر اپنی گرفت مضبوط کرلی۔ افغانستان نے پہلے میچ کے مقابلے میں پاور پلے کے دوران سپنرز کو آزمایا، تاہم یہ حکمت عملی بھی انڈیا کی تیز رفتار بیٹنگ کو روکنے میں ناکام رہی۔
راشد خان نے پاور پلے کے بعد بولنگ شروع کی اور ساتویں اوور میں ابھیشیک شرما کو ڈیپ مڈ وکٹ پر کیچ آؤٹ کروا کے پہلی کامیابی حاصل کی۔ سنجو سیمسن نے 20 گیندوں پر اپنی ساتویں ٹی 20 نصف سنچری مکمل کی، تاہم راشد خان نے اسی اوور میں انہیں بھی لانگ آف پر کیچ آؤٹ کروا دیا۔
اس سیکشن میں متعلقہ حوالہ پوائنٹس شامل ہیں (Related Nodes field)
انڈیا نے صرف 7.1 اوورز میں 100 رنز مکمل کرلیے۔ راشد خان نے کپتان شریاس آئر کو بھی سلپ میں کیچ کروا کے اپنی تیسری وکٹ حاصل کی، تاہم ایشان کشن نے ناقابلِ شکست 38 اور تلک ورما نے 15 رنز بنا کر ٹیم کو فتح سے ہمکنار کر دیا۔
اس سے قبل افغانستان نے ٹاس ہارنے کے بعد پہلے بیٹنگ کی اور ایک مرتبہ پھر اس کا آغاز خراب رہا۔ رحمان اللہ گرباز مسلسل دوسرے میچ میں صفر پر آؤٹ ہوئے، انہیں ارشدیپ سنگھ نے پویلین بھیجا۔
افغانستان کے کپتان ابراہیم زدران نے 33 گیندوں پر 37 رنز بنا کر پاور پلے میں مزید وکٹیں گرنے سے ٹیم کو بچایا۔
تاہم درمیانی اوورز میں افغانستان کی بیٹنگ لڑکھڑا گئی اور ٹیم 59 رنز پر 2 وکٹوں سے 100 رنز پر 6 وکٹوں تک پہنچ گئی۔ نتیش ریڈی نے دو اہم وکٹیں حاصل کرکے افغانستان کی مشکلات میں اضافہ کیا۔
بعد ازاں راشد خان اور محمد نبی نے 28 گیندوں پر 48 رنز کی شراکت قائم کرکے افغانستان کو 159 رنز تک پہنچانے میں اہم کردار ادا کیا۔
سیریز کا پہلا میچ بھی انڈیا نے 7 وکٹوں سے جیتا تھا۔ دونوں ٹیموں کے درمیان تیسرا اور آخری ٹی 20 میچ جمعرات کو کھیلا جائے گا۔
