اطالوی اخبار گازیٹا دیلو سپورٹ کی رپورٹ کے مطابق سابق بیلون ڈی اور اور ورلڈ کپ فاتح رونالڈینیو 46 سال کی عمر میں ریٹائرمنٹ ختم کر کے اٹلی کے تیسرے درجے کے کلب ریوینا کے لیے کھیلنے والے ہیں۔
اخبار کے مطابق رونالڈینیو منگل کو میامی میں معاہدے پر دستخط کرنے والے تھے اور وہ پہلے ہی کلب ورلڈ کپ کے سلسلے میں امریکہ میں موجود ہیں۔
اے ایف پی نے جب اس معاملے پر رابطہ کیا تو معاہدے سے واقف ایک ذریعے نے اس خبر کی تصدیق کی۔
گازیٹا نے رونالڈینیو کے حوالے سے لکھا ’میں دوبارہ گیند کے ساتھ اپنا جادو دکھانے اور اگنازیو چپریانی (ریوینا کے اطالوی-امریکی مالک) اور ان کے خاندان کے ساتھ ایک نئی کہانی رقم کرنے کا بے صبری سے انتظار کر رہا ہوں۔‘
انہوں نے مزید کہا ’فٹ بال ہمیشہ میرے لیے خوشی کا ذریعہ رہی ہے۔ میں یہی جذبہ ریوینا میں بھی لے کر آنا چاہتا ہوں۔‘
اس سیکشن میں متعلقہ حوالہ پوائنٹس شامل ہیں (Related Nodes field)
تاہم ریوینا کے نائب صدر آریڈو بریدا نے اطالوی میڈیا کو بتایا کہ رونالڈینیو کی شمولیت ٹیم کو مضبوط بنانے سے زیادہ ایک مارکیٹنگ حکمتِ عملی ہے اور ممکن ہے کہ وہ کبھی عملی طور پر میدان میں نہ اتریں۔
انہوں نے کہا ’وہ ایک جادوئی کھلاڑی ہیں اور ان کی رجسٹریشن ہمارے لیے بہت بڑی کامیابی ہے۔‘
بریدا نے مزید کہا ’کیا وہ 46 سال کی عمر میں کھیلیں گے؟ یہ حالات پر منحصر ہے، لیکن وہ کلب کے رجسٹرڈ کھلاڑی ہوں گے۔‘
رونالڈینیو نے آخری بار 2015 میں برازیلین کلب فلومینینسے کے لیے دو ماہ کے مختصر دورانیے میں پیشہ ورانہ فٹ بال کھیلی تھی۔
