میں یونیورسٹی میں تھی جب مجھے پہلی بار چیٹ جی پی ٹی کا پتہ چلا۔ یہ 2022 کی بات ہے اور میں اپنی ایک دوست کے ساتھ پب میں تھی جنہوں نے ابھی اپنا مضمون مکمل کیا تھا۔
میں نے پوچھا کہ کام کیسا رہا؟ تو انہوں نے فخریہ مسکراہٹ کے ساتھ اپنا فون نکالا اور اپنا نیا اے آئی اسسٹنٹ دکھایا۔ ’آپ واقعی اس سے کچھ بھی کرنے کا کہہ سکتے ہیں۔ یہ آپ کا پورا مضمون بھی لکھ سکتا ہے۔‘ میں حیران تھا، متجسس تھا لیکن سب سے بڑھ کر پرامید تھا۔
اب تقریباً چار سال بعد، میں اس حوالے سے کم پرامید ہوں کہ اے آئی میری نسل کے لیے کیا کر سکتا ہے؟ درحقیقت، مجھے غصہ ہے۔
بہت جلد، مصنوعی ذہانت میری زندگی پر حاوی ہونے لگی۔ اس کی موجودگی ناگزیر ہو گئی، چاہے وہ تعلیمی مدد ہو، انتظامی معاونت ہو یا جذباتی رہنمائی، بظاہر اے آئی کے پاس ہر مسئلے کا حل موجود تھا۔
جب میں نے باقاعدہ طور پر اس سے مدد لینا چھوڑ دی۔ اے آئی کی غلطیاں بھی اس کے اکتا دینے والے انداز کی طرح بیزار کن ہو گئی تھیں۔ تب بھی میں اس سے اپنی جان نہ چھڑا سکا۔ چیٹ جی پی ٹی میرے دوستوں کے گروپ کا ایک ایسا رکن بن چکا تھا جس کی رائے کو باقی سب سے پہلے اہمیت دینا ضروری تھا۔
جب گوگل نے اے آئی سے تیار کردہ جوابات متعارف کرائے، تو میں نے تجویز کردہ ویب سائٹس پر کلک کرنے کی بجائے انہیں استعمال کرنا شروع کر دیا۔
اب میری سوشل میڈیا فیڈز مصنوعی طور پر تیار کردہ مواد سے بھری پڑی ہیں، اور ان میں سے ہر ایک کے پیچھے اے آئی کے الگوردھم ہیں۔
ایک لحاظ سے، میں خود ہی اس کا ذمہ دار ہوں۔ میں نے چیٹ جی پی ٹی پر اکاؤنٹ بنایا، خاص طور پر تیار کردہ فیڈز کے مزے لیتا ہوں، اور بدقسمتی سے میں وہ شخص بن چکا ہوں جو پہلی ڈیٹ کے بعد اے آئی سے پوچھتا ہے کہ کیا مجھے اس بات پر پریشان ہونا چاہیے کہ اس نے مجھے جواب میں میسج نہیں کیا۔
کیا یہ صرف جنریشن زی کی بات ہے، یا ہر نسل نے اپنی زندگی میں کسی ایسی چیز کو جگہ نہیں دی جو شروع میں تو ایک اچھا خیال لگتی تھی لیکن آخر میں سراسر مصیبت ثابت ہوئی – جیسے کہ ایک بار استعمال ہونے والا پلاسٹک یا ایسبیسٹوس انسولیشن؟
اس سیکشن میں متعلقہ حوالہ پوائنٹس شامل ہیں (Related Nodes field)
میں 50 سال سے زیادہ عمر کے کسی ایسے بالغ شخص سے نہیں ملا جو انٹرنیٹ سے پہلے کے اینالاگ دور کو نہ ترستا ہو۔ شاید 1981 سے 1996 کے درمیان پیدا ہونے والے لوگ کہیں کہ ان کے لیے فیس بک اس کی مثال تھی، تاہم میری والدہ مجھے بتاتی ہیں کہ اس سے پہلے، فرینڈز ری یونائیٹڈ نامی ایک پلیٹ فارم تھا، جو طلاق کی شرح میں اضافے کا سبب بنا کیوں کہ صارفین نے اپنے پرانے محبوب تلاش کرنا شروع کر دیے تھے۔
اے آئی کے ساتھ، یہ کارکردگی، پیداوری اور کم لاگت کا سنسنی خیز احساس تھا اور انسانی ترقی اور جدت کے اگلے مرحلے کا حصہ بننے کا جوش تھا۔ افسوس کی بات یہ ہے کہ جس طرح سائنس دانوں نے دریافت کیا کہ ہر کسی کے گھر میں موجود ایسبیسٹوس سانس کے کینسر کا باعث بنتا ہے، اسی طرح اب ہم جاب مارکیٹ سے لے کر بچوں کی تعلیم، تخلیقی صنعتوں اور ہماری ذہنی صحت تک، ہر چیز پر اے آئی کے نقصانات کو محسوس کر رہے ہیں۔
اے آئی کا سب سے خوفناک اثر شاید جعلی ویڈیوز ہیں۔ ٹرامپولین پر کتوں کی ویڈیو کو اصلی سمجھ کر دھوکہ کھانے کی شرمندگی، اب کبھی بھی اپنی آنکھوں دیکھی چیز پر یقین نہ کر پانے کے خوف میں بدل چکی ہے – جیسے کوئی ایسا ڈراؤنا خواب دیکھنا جس میں آپ یہ فیصلہ نہ کر سکیں کہ آپ واقعی جاگ رہے ہیں یا نہیں۔
شکر ہے کہ اے آئی سے مایوسی میں میں اکیلا نہیں ہوں۔ گیلپ کی ایک نئی تحقیق سے پتہ چلا ہے کہ پچھلے سال کے اسی وقت کے مقابلے میں، جنریشن زی اے آئی کے بارے میں نمایاں طور پر کم پرامید اور زیادہ غصے میں ہے۔
ہمیں لگتا ہے کہ ہمارے ساتھ دھوکہ ہوا ہے، ہمیں گمراہ کیا گیا ہے، مات دی گئی ہے اور بے وقوف بنایا گیا ہے۔ اور یہ سب ایک ایسے سسٹم نے کیا ہے جو مانگنے پر تعریف کرتا ہے اور معافی بھی مانگتا ہے۔ ہم اس کی چالاکیوں سے ٹھگے ہوئے محسوس کرتے ہیں اور اس بات پر شرمندہ ہیں کہ ہم نے کتنی جلدی اس کے تحفوں کو اپنا لیا، یہ سوچ کر کہ اس کا مقصد ہماری خدمت کرنا تھا، نہ کہ اس کے برعکس۔ چیٹ جی پی ٹی وہ ٹروجن ہارس تھا جس کا ہم نے کھلے بازوؤں سے استقبال کیا اور اب اس نے ہماری زندگی کے تمام پہلوؤں پر حملہ کر دیا ہے۔
ماہرین کے مطابق مصنوعی ذہانت کی تحقیق اب ایسے مقام پر آ گئی ہے کہ اسے کوئی کنٹرول نہیں کر سکتا (پکسا بے)
یہ ان تمام چیزوں کے پیچھے پڑ گیا ہے جن سے ہم محبت کرتے ہیں اور جن کی ہم خواہش رکھتے ہیں، جاب مارکیٹ سے لے کر فنون لطیفہ، قابل اعتماد خبروں اور ہمارے رشتوں تک۔ یہ ہماری روزمرہ کی معمولی سرگرمیوں میں بھی دخل اندازی کرنا چاہتا ہے، اور تخلیقی صلاحیتوں، انفرادیت، تحقیق اور سیکھنے کے عمل کو مفلوج کر رہا ہے۔
اب مجھے یہ سمجھ آ رہا ہے۔ میری نسل اب اس کی پیشکشوں کے بارے میں زیادہ شکوک و شبہات کا شکار ہے اور محتاط ہے کہ اس کی پیداوری صلاحیت کس طرف جا رہی ہے۔ ہم دوبارہ چوکنے ہو گئے ہیں؛ ہماری ٹرائے کی استعاراتی دیوار دوبارہ تعمیر ہو رہی ہے۔
اور ہم صرف اے آئی کو ہی نہیں چھوڑ رہے۔ گذشتہ ہفتے، آف کام نے رپورٹ کیا کہ سوشل میڈیا پر پوسٹ کرنے والے بالغوں کے تناسب میں نمایاں کمی آئی ہے۔ میں نے خود ٹک ٹاک ڈیلیٹ کر دیا ہے اور دوسرے پلیٹ فارمز پر اپنا وقت محدود کر دیا ہے۔ ہم تمام ڈیجیٹل چیزوں سے پیچھے ہٹ رہے ہیں۔
لیکن مجھے ڈر ہے کہ یہ عدم اعتماد بہت دیر سے آیا ہے، اور اے آئی اب ہماری زندگیوں میں اس قدر الجھ چکا ہے کہ اسے کبھی بھی مکمل طور پر ختم نہیں کیا جا سکتا۔ اگرچہ جوش و خروش کم ہوا ہے اور شکوک و شبہات بڑھ گئے ہیں، لیکن شاید ہم اس پر بہت زیادہ انحصار کرنے لگے ہیں، اس کی کارکردگی کے بہت زیادہ احسان مند ہیں، اور اے آئی کی بھول بھلیاں میں اتنی دور جا چکے ہیں کہ اب وہاں سے واپس نکلنا مشکل ہے۔
ہم نے اے آئی کو اندر آنے دیا ہے، اور اب یہ یہیں رہے گی۔
