امریکی ریاست آئیڈاہو کے شمال مغربی علاقے میں اتوار کو ایک ایئر شو کے دوران دو لڑاکا طیارے آپس میں ٹکرا گئے، تاہم دونوں طیاروں کے پائلٹس پیراشوٹ کے ذریعے محفوظ رہنے میں کامیاب رہے۔
گن فائٹر سکائز ایئر شو کی ویب سائٹ پر جاری بیان میں تصدیق کی گئی ہے کہ ماؤنٹین ہوم ایئر فورس بیس کے قریب تقریباً دو میل شمال مغرب میں ’طیارے کا حادثہ‘ پیش آیا۔
بیان میں کہا گیا ہے کہ ہنگامی امدادی ٹیمیں موقع پر موجود ہیں، جبکہ حادثے کی تحقیقات جاری ہیں اور مزید تفصیلات بعد میں جاری کی جائیں گی۔
امریکی میڈیا ادارے سی بی ایس نیوز سے وابستہ مقامی چینل کومو کے مطابق بحریہ کے دو EA-18 لڑاکا طیاروں میں موجود چاروں عملے کے ارکان بحفاظت باہر نکلنے میں کامیاب رہے۔
اس سیکشن میں متعلقہ حوالہ پوائنٹس شامل ہیں (Related Nodes field)
سوشل میڈیا پر شیئر کی گئی ویڈیوز میں دیکھا جا سکتا ہے کہ دونوں طیارے فضا میں ٹکرانے کے بعد زمین پر گر جاتے ہیں، جس کے بعد زور دار دھماکہ ہوا اور سیاہ دھوئیں کے بادل اٹھتے دکھائی دیے، جبکہ چار پیراشوٹ آہستہ آہستہ زمین کی طرف اترتے نظر آئے۔
آئیڈاہو سٹیٹس مین کے مطابق یہ ایئر شو 2018 کے بعد پہلا بڑا فضائی مظاہرہ تھا، جب ایک ہینگ گلائیڈر پائلٹ حادثے میں جان سے گیا تھا۔
امریکی بحری فضائیہ کی ترجمان کمانڈر امیلیا اویام نے کومو کو بتایا کہ EA-18G گرولر طیارے واشنگٹن کے علاقے وِڈبی آئی لینڈ میں تعینات ہیں۔
این بی سی نیوز کے مطابق حادثے کے بعد ایئر شو منسوخ کر دیا گیا جبکہ تحقیقات اور امدادی کارروائیوں کے باعث ایئر بیس کو لاک ڈاؤن کر دیا گیا۔
