پاکستان میں پیٹرول کی قیمتوں کی نگرانی کرنے والی کمیٹی نے کہا ہے کہ ملک میں ایندھن کے مجموعی ذخائر تسلی بخش سطح پر موجود ہیں اور آئندہ ماہ کے لیے پیٹرول کی ترسیل کو یقینی بنانے کے لیے کارگو حاصل کیے جا چکے ہیں۔
جبکہ امریکہ اور ایران کے درمیان متوقع مذاکرات کے تناظر میں بدھ کو عالمی منڈی میں تیل کی قیمتوں میں تقریباً 5 فیصد تک کمی ریکارڈ کی گئی۔
وفاقی وزیر خزانہ کی زیر صدارت عید کی تعطیلات کے بعد منگل کو ایک اجلاس منعقد ہوا جس میں توانائی کی فراہمی کی صورت حال کا جائزہ لیا گیا اور بدلتی ہوئی جغرافیائی سیاسی صورت حال کے تناظر میں عالمی تیل و گیس مارکیٹس میں ہونے والی پیش رفت کا بھی تجزیہ کیا گیا۔
کمیٹی کے اجلاس میں بتایا گیا کہ ’مارچ اور اپریل کے لیے پیٹرول کے بیشتر کارگو پہلے ہی محفوظ کیے جا چکے ہیں، اور مزید کھیپیں بھی منصوبہ بندی میں شامل ہیں تاکہ ذخائر کو مزید مضبوط بنایا جا سکے۔
Cabinet Committee Maintains Close Watch on Energy Supplies; Reviews Stocks and Global Trends
A meeting of the Committee to Monitor Petrol Prices was held today under the chairmanship of the Federal Minister for Finance and Revenue, Senator Muhammad Aurangzeb, following the Eid… pic.twitter.com/OZzssV1j8L
— Ministry of Finance, Government of Pakistan (@Financegovpk) March 24, 2026
’ریفائنریاں معمول کے مطابق پیداوار جاری رکھے ہوئے ہیں اور خام تیل کی مؤثر پراسیسنگ کے لیے بھرپور کوششیں کی جا رہی ہیں۔‘
کمیٹی نے قومی سطح پر پیٹرولیم مصنوعات کی فراہمی کے مستقبل کے امکانات کا جائزہ لیا، جس میں خام تیل اور ریفائن شدہ پیٹرولیم مصنوعات کے ذخائر کی دستیابی کو توانائی کی پوری سپلائی چین میں پرکھا گیا۔
اراکین کو آگاہ کیا گیا کہ مجموعی ذخائر تسلی بخش سطح پر موجود ہیں، جو محفوظ درآمدی انتظامات اور جاری پیداوار کی بدولت برقرار ہیں۔
اس سیکشن میں متعلقہ حوالہ پوائنٹس شامل ہیں (Related Nodes field)
’درآمدی ٹرمینلز سے ریفائنریوں، ذخیرہ گاہوں اور ریٹیل آؤٹ لیٹس تک سپلائی لائنز مستحکم اور منظم انداز میں کام کر رہی ہیں، جس سے ملک بھر میں مسلسل فراہمی یقینی بن رہی ہے۔‘
اجلاس میں درآمدی لاجسٹکس اور بحری آپریشنز پر بھی بریفنگ دی گئی، جس میں بتایا گیا کہ ایندھن کی ترسیل کے لیے کارگو آمد اپنے شیڈول کے مطابق جاری ہے۔
کمیٹی نے عالمی قیمتوں کے رجحانات اور ان کے ملکی سطح پر اثرات کا جائزہ لیا، اور اس بات پر زور دیا کہ حکومت بین الاقوامی اور مقامی قیمتوں کے فرق کا مسلسل تجزیہ کر رہی ہے تاکہ متوازن اور بروقت پالیسی سازی ممکن ہو سکے۔
اجلاس کی صدارت کرتے ہوئے وزیر خزانہ نے کہا کہ پیشگی منصوبہ بندی، متنوع خریداری حکمت عملی، اور تمام متعلقہ اداروں کے درمیان قریبی تعاون کی بدولت پاکستان عالمی اتار چڑھاؤ کے باوجود مقامی سطح پر توانائی کی مستحکم فراہمی برقرار رکھنے میں کامیاب رہا ہے۔
انہوں نے متعلقہ اداروں کو ہدایت کی کہ عالمی حالات، ذخائر اور سپلائی چین کی صورتحال پر مسلسل نظر رکھیں تاکہ بروقت اور مربوط پالیسی اقدامات کیے جا سکیں۔
وزیر خزانہ نے اس بات کا اعادہ کیا کہ ’پیٹرولیم مصنوعات کی بلا تعطل فراہمی حکومت کی اولین ترجیح ہے، اور یہ کہ مستقل تعاون اور محتاط منصوبہ بندی کے ذریعے مارکیٹ میں استحکام اور قومی توانائی کے تحفظ کو یقینی بنایا جاتا رہے گا۔‘
