پختونخوا،بلوچستان میں مارکیٹ اور شادی ہالوں کی بندش کے اوقات مقرر

بلوچستان اور خیبرپختونخوا حکومتوں نے توانائی کی بچت کے اقدامات کا اعلان کرتے ہوئے بازاروں، ریستورانوں اور شادی ہالز کی بندش کے اوقات مقرر کر دیے ہیں۔

خیبر پختونخوا

خیبر پختونخوا کے چیف سیکرٹری کے دفتر سے جاری ہونے والے ایک پبلک نوٹس میں کہا گیا ہے کہ ڈویژنل ہیڈ کوارٹرز میں تمام مارکیٹیں، شاپنگ پلازہ، تجارتی مراکز اور رات کے وقت دوسری سرگرمیاں رات 9 بجے تک بند کر دی جائیں۔

تاہم دیگر اضلاع میں بازار، شاپنگ پلازہ اور تجارتی ادارے رات 8 بجے تک بند ہو جائیں۔

نوٹس میں مزید کہا گیا ہے کہ تمام ریستوران، کیفے اور کھانے پینے کی جگہیں رات 10 بجے تک بند ہو جائیں لیکن ہوم ڈیلیوری اور ٹیک اوے کی خدمات ان گھنٹوں کے بعد بھی فراہم کی جا سکتی ہیں۔

نوٹس کے مطابق، شادی ہالوں، مارکیز، ایونٹ ہال، ایونٹ لان اور دوسری سرکاری/نجی تقریبات رات 10 بجے تک ختم کرنے کا حکم جاری کیا گیا ہے۔  

نوٹس میں زراعت اور تعمیراتی سرگرمیوں، لیبارٹریز اور ہنگامی صحت کی خدمات، تندور جو مکمل طور پر فوری استعمال کے لیے روٹی،نان کی تیاری اور فروخت میں مصروف ہیں، پیٹرول پمپ، صرف ایندھن کی فراہمی کے سلسلے میں اور پبلک ٹرانسپورٹ ٹرمینلز، صرف محدود آپریشنل لائٹنگ کے ساتھ ان پابندیوں سے مستثنیٰ ہوں گے۔

نوٹس میں کہا گیا ہے کہ میڈیکل اسٹورز اور فارمیسیوں کو بھی ان پابندیوں سے استثنیٰ دیا گیا ہے، لیکن یہ کچھ شرائط کے ساتھ ہو گا۔

صنعتی اور پیداواری سرگرمیوں کے لیےمزید کہا کہ تمام صنعتی یونٹس، مینوفیکچرنگ کی سہولیات، پروسیسنگ یونٹس، ورکشاپس اور ایکسپورٹ پر مبنی کاروباری اداروں کو مستثنیٰ رہنا چاہیے۔

نوٹس میں مزید کہا گیا کہ اس طرح کے یونٹوں سے منسلک کمرشل، ریٹیل یا شو روم کے اجزا کو بند ہونے کے مقررہ اوقات کی تعمیل کرنی چاہیے۔

نوٹس میں کہا گیا ہے کہ عمارتوں، پلازوں، مارکیز، ایونٹ کے لان اور کمرشل احاطے پر ’آرائشی اور دیگر غیر ضروری لائٹنگ ‘کو بھی توانائی کے تحفظ کے لیے استعمال نہیں کیا جانا چاہیے۔

اس میں کہا گیا ہے کہ عمارتوں، تجارتی احاطے اور تقریب کے مقامات پر آرائشی یا نمائش کے مقاصد کے لیے استعمال ہونے والی فلڈ لائٹس، سپاٹ لائٹس اور اسی طرح کی تیز روشنی کا استعمال بھی نہ کیا جائے، اس کے علاوہ بازاروں، شاپنگ پلازوں، اور مخلوط استعمال کی کمرشل عمارتوں صرف ضروری روشنیاں استعمال کی جائیں۔ 

نوٹس میں کہا گیا ہے کہ کاروباری مراکز اور دفاتر وغیرہ کے بند ہونے کے بعد جلنے والے بل بورڈز، ہورڈنگز، ڈیجیٹل ڈسپلے بورڈز اور ایل ای ڈی سکرینیں بند رہیں۔

تجارتی عمارتوں میں ایئر کنڈیشننگ، ایسکلیٹرز اور لفٹوں کو کاروباری اوقات کے بعد استعمال نہیں کیا جانا چاہیے، سوائے اس کے کہ جہاں مستثنیٰ ضروری خدمات کی ضرورت ہو، جبکہ بندش کے اوقات کے بعد غیر ضروری تجارتی سرگرمیوں کے لیے جنریٹرز کے استعمال کی اجازت نہیں ہو گی۔

پبلک سیکٹر کی تعمیل کے بارے میں، نوٹس میں کہا گیا ہے کہ تمام سرکاری دفاتر کو سختی سے توانائی کے تحفظ کو یقینی بنانا چاہیے، بشمول لائٹس، ایئر کنڈیشننگ اور آلات کو فوری طور پر بند کرنا جب افسراورعملہ احاطے میں نہ ہوں اور دفتری اوقات کے بعد۔

مزید کہا گیا، ’کوئی بھی اوقات کار کے بعد دفتری سرگرمی نہیں کی جائے گی سوائے اس کے جہاں عوامی مفاد میں یا ہنگامی مقاصد کے لیے ضروری ہو۔ عوامی عمارتوں کی غیر ضروری روشنی سے گریز کیا جائے۔

بلوچستان

محکمہ داخلہ بلوچستان کی جانب سے جاری نوٹیفکیشن کے مطابق تمام مارکیٹیں اور شاپنگ سینٹرز رات 8 بجے تک بند کردیے جائیں گے۔ تاہم فارمیسیوں، تندوروں اور بیکریوں کو اس پابندی سے مستثنیٰ قرار دیا گیا ہے۔

نوٹیفکیشن میں یہ بھی کہا گیا ہے کہ شادی ہالز، بینکوئٹ ہالز اور ہوٹلوں میں منعقد ہونے والی تمام تقریبات رات 10 بجے تک ختم ہو جائیں اور ریستوران بھی رات 10 بجے تک بند ہو جائیں۔