وزارت خزانہ کے مطابق حکومت پاکستان اور حکومت امریکہ نے جمعرات کو نیویارک میں روزویلٹ ہوٹل کے آپریشن، دیکھ بھال، تجدید اور ترقی کے حوالے سے ایک اہم اقتصادی اور اسٹریٹجک منصوبے کا باضابطہ آغاز کر دیا ہے، جس میں امریکہ کی جنرل سروسز ایڈمنسٹریش کے ساتھ تعاون بھی شامل ہے۔
امریکہ کے سابق صدر تھیوڈور روزویلٹ سے منسوب، نیویارک کے علاقے مین ہٹن کے وسط میں قائم یہ 100 سال قدیم عمارت پاکستان کے قیمتی ترین غیر ملکی اثاثوں میں شمار ہوتی ہے، جسے اسلام آباد نے 2000 میں حاصل کیا تھا۔ مسلسل بڑھتے خسارے کے باعث 1000 سے زائد کمروں پر مشتمل یہ ہوٹل 2020 میں بند کر دیا گیا جبکہ اس ہوٹل کو مختصر مدت کے لیے تارکین وطن کی رہائش گاہ کے طور پر بھی استعمال کیا گیا۔
اس سیکشن میں متعلقہ حوالہ پوائنٹس شامل ہیں (Related Nodes field)
وزارت خزانہ کی جانب سے جاری کیے گئے بیان میں کہا گیا کہ ’نیویارک کے زوننگ اور پییچدہ میونسپل قوانین کے پس منظر میں اس فریم ورک کے تحت ادارہ جاتی ہم آہنگی سے منصوبے پر عمل درآمد آسان ہو گا، قوانین کی وضاحت بہتر ہو گی اور لین دین کی قیمت میں زیادہ سے زیادہ اضافہ ممکن ہوگا۔ ایسے فریم ورک بین الاقوامی رئیل سٹیٹ اور بنیادی ڈھانچے کے منصوبوں میں رائج ہیں۔‘
مزید کہا گیا کہ ’منصوبے کا مقصد اس جائیداد سے زیادہ سے زیادہ مالی فائدہ حاصل کرنا ہے تاکہ حکومت کی نجکاری حکمت عملی کے ساتھ ساتھ پاکستان اور امریکہ کے اقتصادی تعلقات بھی مضبوط ہوں۔‘
دستاویز پر امریکہ کی جانب سے ایڈمنسٹریٹر ایڈورڈ سی فورسٹ اور پاکستان کی جانب سے وفاقی وزیر خزانہ و ریونیو سینیٹر محمد اورنگزیب نے دستخط کیے۔ اس موقعے پر وزیراعظم پاکستان شہباز شریف اور امریکی خصوصی نمائندہ سٹیو وٹکوف بھی موجود تھے۔
اس مفاہمتی یادداشت کی بدولت دو طرفہ تعاون کے تکنیکی، تجارتی اور اقتصادی پہلوؤں کے مشترکہ جائزے کے لیے ایک منظم اور وقت کے لحاظ سے پابند فریم ورک دستیاب ہو گا، جس سے شفاف، منظم اور باہمی مفاد پر مبنی ترقی کو یقینی بنایا جا سکے گا۔
