آئی سی سی ٹی ٹوئنٹی ورلڈ کپ 2026 کا سپر ایٹ مرحلہ جاری ہے اور ہمیشہ کی طرح اس مرتبہ بھی پاکستان کے سیمی فائنل تک پہنچنے کے امکانات سے متعلق جمع تفریق شروع ہو چکی ہے۔
گروپ بی میں شامل پاکستان نے نیوزی لینڈ کے خلاف میچ بارش کی وجہ سے منسوخ ہونے پر ایک پوائنٹ حاصل کیا اور انگلینڈ کے خلاف میچ میں شکست سے ان کی دوڑ متاثر ہوئی۔
اب سب کی نظریں 28 فروری کو سری لنکا کے خلاف ہونے والے میچ پر لگی ہیں، جو پاکستان کو ہر صورت جیتنا ہو گا، تاکہ وہ 3 پوائنٹس حاصل کر سکے، ورنہ وہ سیمی فائنل کی دوڑ سے باہر ہو جائے گا۔
انگلینڈ 24 فروری کو پاکستان کو شکست دے کر گروپ 2 میں دو میچوں میں دو کامیابیوں کے ساتھ پہلے ہی سیمی فائنل میں پہنچنے والی واحد ٹیم بن چکی ہے۔
اس سیکشن میں متعلقہ حوالہ پوائنٹس شامل ہیں (Related Nodes field)
گروپ بی میں پوائنٹس ٹیبل کے مطابق انگلینڈ کے پاس 2 میچوں میں 4 پوائنٹس ہیں، نیوزی لینڈ کے 3 پوائنٹس ہیں اور پاکستان کے 2 میچوں کے بعد صرف 1 پوائنٹ ہے جبکہ ایونٹ کی شریک میزبان ٹیم سری لنکا 0 پوائنٹس کے ساتھ باہر ہو گئی ہے۔
موجودہ نیٹ رن ریٹ کو اگر دیکھا جائے تو نیوزی لینڈ کی پوزیشن +3.050 رن ریٹ کے ساتھ پاکستان اور انگلینڈ کے مقابلے میں مضبوط نظر آتی ہے۔
پاکستان اب بھی سیمی فائنل تک پہنچنے کے امکانات رکھتا ہے لیکن یہ اب ان کے اپنے ہاتھ میں نہیں ہے اور سری لنکا کے خلاف جیتنے کے ساتھ ساتھ دیگر نتائج بھی گرین شرٹس کے حق میں ہونے چاہییں، جیسے کہ نیوزی لینڈ کو باقی میچوں میں شکست یا کم رن ریٹ سے شکست، تاکہ پاکستان کا نیٹ رن ریٹ بہتر ہو جائے۔
اگر پاکستان سری لنکا کے خلاف میچ ہار جاتا ہے تو وہ سیمی فائنل سے باہر ہو جائے گا۔ اگر پاکستان جیتتا ہے تو بھی اس کے لیے ضروری ہے کہ نیوزی لینڈ کم از کم اپنے ایک میچ میں ہار جائے یا پھر پاکستان اور نیوزی لینڈ دونوں 3 پوائنٹس تک پہنچ جائیں تو سیمی فائنل کی جگہ نیٹ رن ریٹ پر فیصلہ ہوگا، جس میں پاکستان کا نیٹ رن ریٹ موجودہ صورت حال میں کمزور ہے۔
پاکستانی کھلاڑی 24 فروری 2026 کو کینڈی کے پالی کیلے انٹرنیشنل کرکٹ سٹیڈیم میں آئی سی سی مینز ٹی ٹوئنٹی کرکٹ ورلڈ کپ 2026 کے سپر ایٹ مرحلے میں انگلینڈ کے خلاف کھیلے گئے میچ میں شکست کے بعد واپس پویلین جاتے ہوئے (دیبیانگشو سرکار / اے ایف پی)
مختصراً پاکستان کے سیمی فائنل میں پہنچنے کے امکانات اب بھی موجود ہیں لیکن انہیں اپنی کارکردگی کے ساتھ ساتھ دیگر ’اچھے نتائج‘ بھی درکار ہیں اور اب ان کی تقدیر پوری طرح ان کے اپنے ہاتھ میں نہیں ہے۔
اسی طرح سپر ایٹ مرحلے میں گروپ اے میں ویسٹ انڈیز کی ٹیم دو پوائنٹس کے ساتھ گروپ میں سرفہرست ہے۔ اگرچہ جنوبی افریقہ کے بھی دو پوائنٹس ہیں، لیکن کم نیٹ رن ریٹ کی وجہ سے وہ ویسٹ انڈیز سے نیچے دوسرے نمبر پر ہے۔
حیران کن طور پر ٹورنامنٹ کی مضبوط ٹیم سمجھی جانے والی انڈین ٹیم تیسرے نمبر پر ہے اور اس کے پاس کوئی پوائنٹ نہیں ہے۔ احمد آباد میں جنوبی افریقہ کے ہاتھوں بھاری شکست کے بعد ان کا نیٹ رن ریٹ منفی ہو چکا ہے۔
اب اگر ویسٹ انڈیز یا زمبابوے آئندہ میچوں میں انڈیا کو شکست دے دیتے ہیں تو انہیں ابتدائی مرحلے میں ہی ٹورنامنٹ سے باہر ہونے کا سنگین خطرہ لاحق ہے۔
گروپ اے میں سری لنکا سب سے نیچے ہے، جس کے بھی صفر پوائنٹس ہیں اور وہ ٹورنامنٹ سے باہر ہو چکا ہے۔ انڈیا کی طرح زمبابوے بھی اگلا میچ ہارنے کی صورت میں ٹورنامنٹ سے بے دخلی کے دہانے پر کھڑا ہے۔
